Íslenska

Í íslenskunámi á háskólastigi er fengist við íslenskt mál og samtímabókmenntir en einnig fjallað um rætur íslenskra bókmennta og uppruna íslenskrar tungu.

  • Grunnnámi lýkur með BA gráðu
  • Námstími er þrjú ár

Hægt er að sérhæfa sig á tilteknu sviði með áherslu á íslenskar nútímabókmenntir, nútímamál, fornbókmenntir, fornmál, miðaldafræði, ritfærni, máltækni eða talmeinafræði.

Námsvalshjól Háskóla Íslands

Að komast í námið

Inntökuskilyrði er stúdentspróf af bóknámsbraut eða sambærilegt nám. Nauðsynlegt er að hafa gott vald á íslensku og vera læs á ensku og Norðurlandamál.

Námið er lánshæft til framfærslu og skólagjalda hjá LÍN. Fræðslusjóðir stéttarfélaga veita oft styrki til náms. Fáðu frekari upplýsingar hjá þínu félagi.

Námsskipulag

Kennslan fer mikið til fram í formi fyrirlestra og umræðutíma auk heimaverkefna og ritgerðasmíði.

Ljúka þarf ákveðnum fjölda námskeiða í bókmenntum og málfræði en einnig eru afar fjölbreytt valnámskeið í tengslum við barnabókmenntir, glæpasögur, máltöku barna, málnotkun, dægurlagatexta og margt fleira.

Einnig er hægt að taka valnámskeið í skyldum greinum á borð við bókmenntafræði, málvísindi og þjóðfræði.

Hvar fer nám fram

Háskólanám í íslensku hefur verið í boði við Íslensku- og menningardeild Háskóla Íslands.  Einnig er nám til meistaragráðu í tengdum greinum á borð við íslensk fræði og íslenska málfræði.

Að námi loknu

Háskólamenntun í íslensku getur nýst á flestum sviðum atvinnulífsins en sem dæmi má nefna kennslu á öllum skólastigum, fræða- og ritstörf eða störf sem tengjast menningu, listum, fjölmiðlun eða útgáfu.

Náms- og starfsráðgjöf

Náms- og starfsráðgjafar hjálpa til við upplýsingaleit og aðstoða að finna leiðir til að bæta færni í námi og efla í starfi.

Um er að ræða ráðgjafa símenntunarmiðstöðva, háskóla, á vegum fagráða eða sérfróða um raunfærnimat.

Ábendingar

Vefurinn í er sífelldri vinnslu við að bæta virkni og innihald. Allar ábendingar um úrbætur eru vel þegnar og við hlustum á allt sem notendur hafa að segja.

Umsjón: Fræðslumiðstöð atvinnulífsins

Umsjónarmaður: Arnar Þorsteinsson (arnar@frae.is)