Ljósmyndarar vinna ýmist við ljósmyndatöku í ljósmyndaveri eða á vettvangi. Viðfangsefnin geta verið af ýmsum toga svo sem persónuljósmyndun, fréttaljósmyndun eða iðnaðar- og auglýsingaljósmyndun. Ljósmyndun er löggilt iðngrein.

Í vinnu sem ljósmyndari gætirðu til dæmis starfað á fjölmiðlum eða á auglýsinga- og ljósmyndastofum. Starfsumhverfi ljósmyndara hefur raunar breyst umtalsvert með tilkomu stafrænnar tækni og skarast nú töluvert við aðrar greinar á borð við vefsmíðar, kvikmyndagerð og þrívíddargrafík.

Helstu verkefni

- vinna við ljósmyndun á blöðum og tímaritum
- taka myndir á vettvangi; frétta-, náttúru-, landslags- og umhverfisljósmyndir
- taka myndir vegna iðnaðar og auglýsinga
- nota sviðslýsingar við myndatöku
- skrá upplýsingar við notkun myndefnis
- mynd- og eftirvinnsla ljósmynda
- vinna ljósmyndir í myrkraherbergi
- vefsíðu- og hreyfimyndagerð

Hæfnikröfur

Ljósmyndarar vinna með fjölbreytilegan tækjabúnað og þurfa að hafa kunnáttu í ljós-, linsu- og litafræði og þekkja til helstu myndvinnsluforrita. Í starfi ljósmyndara er mikilvægt að kunna vel að beita ljósmyndavél og tilheyrandi búnaði auk þess að hafa mismunandi myndatökuform á valdi sínu.

Ljósmyndari þarf að geta unnið sjálfstætt og þekkja vel til geymslu mynda, stafrænna gagna og filma. Einnig að miðla ljósmyndum til útprentunar sem og á vefi og skjámiðla.

Ljósmyndarafélag Íslands