Atvinnumennska í íþróttum

Atvinnumennska í íþróttum felur í sér að þroska hæfileika á ákveðnu sviði með miklum æfingum. Vinnudagurinn snýst um næstu æfingu og undirbúning fyrir mót eða keppni. Atvinnuíþróttafólk er mikið á ferðinni, innan lands og utan auk talsverðra samskipta við styrktaraðila og aðra sem tengjast viðkomandi íþrótt.

Helstu verkefni:

  • skipulagning æfinga með þjálfara
  • gerð áætlunar um hvíld, mataræði o.þ.h.
  • vinna með styrktaraðilum; kynningar, auglýsingar o.fl.
  • æfingar og keppni

Á Íslandi fer atvinnumennska í íþróttum vaxandi og er algengust í knattspyrnu og handbolta en einnig starfar fólk gjarnan við íþróttir samhliða eigin íþróttaferli. Flest atvinnuíþróttafólk tilheyrir ákveðnu íþróttafélagi og er oft í miklum samskiptum við starfsstéttir á borð við lækna, sjúkraþjálfara, nuddara og næringarráðgjafa.

Hvernig verð ég?

Ekki er farið fram á formlega menntun til að sinna atvinnumennsku í íþróttum. Hins vegar er hægt að útskrifast af íþróttabrautum framhaldsskóla eða vera í námi sem skipulagt er með þarfir íþróttafólks í huga.

Ferill atvinnuíþróttafólks er alla jafna styttri en hefðbundinn starfsferill og því algengt að nám sé stundað að hluta samhliða íþróttunum.

Hæfnikröfur

Atvinnufólk í íþróttum þarf að hafa til að bera hæfileika í bland við mikinn vilja til æfinga. Vinnusemi er lykilatriði sem og að geta hvort tveggja unnið sjálfstætt og með öðrum. Í einstaklingsíþróttum þarf gjarnan að skipuleggja vinnudaginn upp á eigin spýtur og eru skipulagshæfileikar því æskilegir. Í hópíþróttum er nauðsynlegt að geta unnið með öðrum og gert það sem er best fyrir liðið.

Náms- og starfsráðgjöf

Náms- og starfsráðgjafar hjálpa til við upplýsingaleit og aðstoða að finna leiðir til að bæta færni í námi og efla í starfi.

Um er að ræða ráðgjafa símenntunarmiðstöðva, háskóla, á vegum fagráða eða sérfróða um raunfærnimat.

Ábendingar

Vefurinn í er sífelldri vinnslu við að bæta virkni og innihald. Allar ábendingar um úrbætur eru vel þegnar og við hlustum á allt sem notendur hafa að segja.

Umsjón: Fræðslumiðstöð atvinnulífsins

Umsjónarmaður: Arnar Þorsteinsson (arnar@frae.is)