Blaða- og fréttamaður

Blaða- og fréttamenn safna saman upplýsingum um fréttnæma atburði og skrifa um þá fréttir sem sendar eru út í blöðum, útvarpi, sjónvarpi og/eða á vef. Starfið snýst að miklu leyti um að túlka upplýsingar, ákveða hvort og hvernig þær skuli notaðar og koma síðan til skila á skýran og upplýsandi hátt. Í starfinu felast gjarnan samskipti við heimildafólk og fréttaritara, utan lands og innan.

Helstu verkefni:

  • safna upplýsingum með viðtölum, gagnaleit og skírskotun til fyrri frétta
  • skipuleggja efni og búa undir fréttaflutning
  • senda fréttir beint af vettvangi
  • rannsaka og greina upplýsingar með tilliti til áreiðanleika
  • ferðast til að afla frétta

Sem blaða- og fréttamaður gætirðu til dæmis starfað á dagblöðum og tímaritum, í útvarpi eða sjónvarpi eða á vefmiðlum af ýmsu tagi. Blaða- og fréttamenn sérhæfa sig stundum í ákveðnum málaflokkum, svo sem íþróttum, efnahagsmálum, stjórnmálum, dómsmálum, atvinnumálum eða erlendum/innlendum fréttum. Flestir þurfa þó að geta sinnt fleiru en sérsviðinu tilheyrir.

Hvernig verð ég?

Blaðamennska er ekki lögbundin starfsgrein og er ákveðinnar menntunar ekki krafist. Flestir starfandi blaða- og fréttamenn eru þó með háskólagráðu í einhverri grein. Á Íslandi er hægt að læra fjölmiðlafræði til BA- gráðu við Háskólann á Akureyri og meistaranám í fjölmiðla- og boðskiptafræði í samvinnu við Háskóla Íslands þar sem einnig má taka fjölmiðlafræði sem hluta af BA – námi. Þá hafa blaðamenn sótt í fjögurra ára BA nám í blaðamennsku til Danmerkur.

Hæfnikröfur

Blaða- og fréttamenn þurfa að hafa afar góð tök á íslensku máli. Samskiptahæfileikar, frumkvæði og skapandi, nákvæm og gagnrýnin hugsun eru miklir kostir í starfi blaða- og fréttamanns ásamt því að fylgjast vel með atburðum líðandi stundar. Í starfinu er mikið unnið með mismunandi tölvuforrit og nauðsynlegt að geta nýtt samfélagsmiðla á borð við Facebook og Twitter. Einnig er mikilvægt að geta notað stafrænar myndavélar, upptökuvélar, farsíma, hljóðnema eða aðra tækni sem við á hverju sinni.

 

Nánari upplýsingar

Náms- og starfsráðgjöf

Náms- og starfsráðgjafar hjálpa til við upplýsingaleit og aðstoða að finna leiðir til að bæta færni í námi og efla í starfi.

Um er að ræða ráðgjafa símenntunarmiðstöðva, háskóla, á vegum fagráða eða sérfróða um raunfærnimat.

Ábendingar

Vefurinn í er sífelldri vinnslu við að bæta virkni og innihald. Allar ábendingar um úrbætur eru vel þegnar og við hlustum á allt sem notendur hafa að segja.

Umsjón: Fræðslumiðstöð atvinnulífsins

Umsjónarmaður: Arnar Þorsteinsson (arnar@frae.is)