Dyravörður

Dyraverðir starfa á veitinga- og skemmtistöðum og hafa þar eftirlit með að farið sé að reglum um afgreiðslutíma, fjölda/aldur gesta og meðferð áfengis. Að auki starfa dyraverðir oft við atburði sem fram fara utan veitingastaða svo sem tónleikahald og útihátíðir.

Helstu verkefni:

  • halda uppi röð og reglu á veitinga- og skemmtistöðum
  • sjá til að skipulag biðraðar fyrir utan skemmtistað sé viðunandi
  • vísa út gestum sem brjóta gegn settum reglum
  • huga að öryggismálum á vinnustað

Í starfinu er samvinna á milli dyravarða afar mikilvæg sem og samvinna og upplýsingagjöf á milli dyravarða, rekstaraðila og lögreglu.

Hvernig verð ég?

Í lögum er heimild til að kveða á um að enginn skuli gegna dyravörslu nema að loknu viðurkenndu námskeiði fyrir dyraverði. Slík námskeið hafa verið haldin á vegum Mímis – símenntunar. Á námskeiðunum er farið yfir atriði sem á reynir við dyravörslu; brunavarnir, ákvæði áfengislaga, hjálp í viðlögum, viðbrögð við óspektum, samskipti við lögreglu og hvernig þekkja má merki um neyslu og sölu ólöglegra vímuefna.

Hæfnikröfur

Dyraverðir þurfa að hafa samþykki lögreglustjóra til starfa, verða að vera að lámarki 20 ára og mega ekki hafa gerst sekir um ofbeldis- eða fíkniefnabrot. Dyravörður þarf að geta haldið ró sinni undir álagi og eru samskiptahæfni, þjónustulund og útsjónarsemi mikilvægir kostir í starfinu ásamt því að hafa burði til að fást við erfiða og jafnvel ofbeldisfulla einstaklinga.

Náms- og starfsráðgjöf

Náms- og starfsráðgjafar hjálpa til við upplýsingaleit og aðstoða að finna leiðir til að bæta færni í námi og efla í starfi.

Um er að ræða ráðgjafa símenntunarmiðstöðva, háskóla, á vegum fagráða eða sérfróða um raunfærnimat.

Ábendingar

Vefurinn í er sífelldri vinnslu við að bæta virkni og innihald. Allar ábendingar um úrbætur eru vel þegnar og við hlustum á allt sem notendur hafa að segja.

Umsjón: Fræðslumiðstöð atvinnulífsins

Umsjónarmaður: Arnar Þorsteinsson (arnar@frae.is)