Fangavörður

Fangaverðir starfa á vöktum í fangelsum við öryggiseftirlit. Í starfinu felst að fylgjast með andlegu og líkamlegu heilsufari fanga, hafa eftirlit með samskiptum þeirra, fylgjast með eftirlitsmyndavélum og fara í eftirlitsferðir um fangelsissvæðið.

Helstu verkefni:

  • lesa dagbók næstu vaktar á undan og fara yfir dagskrá vinnudags
  • taka á móti nýjum föngum, ræða við þá og skrá niður mikilvægar upplýsingar
  • opna vistarverur að morgni dags og læsa aftur að kvöldi
  • stjórna umferð fanga um fangelsið og lóð þess
  • spjalla við fanga og vísa áfram til sérfræðings ef þarf
  • skipuleggja heimsóknir til fanga
  • skrá skýrslur um hvers kyns uppákomur

Fangaverðir  skipuleggja einnig stundum störf fanga innan fangelsisins, íþróttir, tómstundir og skemmtanir. Litið er reglulega eftir föngum sem eru í gæsluvarðhaldi og einangrun og eftirlit haft með útivist, heimsóknum og símatíma.

Hvernig verð ég?

Fangavarðanám er kennt í Fangavarðaskólanum sem heyrir undir Fangelsismálastofnun ríkisins. Fangavarðanám er þrískipt; grunnnám, starfsþjálfun og framhaldsnám, samtals allt að 9 mánuðum. Nýliðanámskeið er um 30 stundir.

Hæfnikröfur

Sem fangavörður þarftu að hafa mikla samskiptahæfileika, áhuga á að vinna með mjög ólíkum einstaklingum og geta brugðist skjótt við breytilegum aðstæðum. Í starfinu eru þolinmæði og ögun mikilvægir eiginleikar ásamt því að eiga auðvelt með að fylgja vinnureglum. Fangaverðir þurfa einnig að geta tileinkað sér nýjungar í starfi og vera í góðu líkamlegu formi.

Tengd störf og námsgreinar

Náms- og starfsráðgjöf

Náms- og starfsráðgjafar hjálpa til við upplýsingaleit og aðstoða að finna leiðir til að bæta færni í námi og efla í starfi.

Um er að ræða ráðgjafa símenntunarmiðstöðva, háskóla, á vegum fagráða eða sérfróða um raunfærnimat.

Ábendingar

Vefurinn í er sífelldri vinnslu við að bæta virkni og innihald. Allar ábendingar um úrbætur eru vel þegnar og við hlustum á allt sem notendur hafa að segja.

Umsjón: Fræðslumiðstöð atvinnulífsins

Umsjónarmaður: Arnar Þorsteinsson (arnar@frae.is)