Fornleifafræðingur

Fornleifafræðingar rannsaka fornar mannvistarleifar, jarðveg og aðrar minjar til að draga upp mynd af lifnaðarháttum og búsetu horfinna kynslóða. Starfið felst í uppgrefti og skráningu fornleifa ásamt ritstörfum og miðlun. Rannsóknir fornleifafræðinga snúa til dæmis að húsarústum, gröfum, líkamsleifum, sorphaugum, áhöldum, vopnum og skartgripum til að fá vísbendingar og upplýsingar um verkkunnáttu, verslunarhætti, trúarbrögð, heilsufar, mataræði og þjóðfélagsstöðu íbúa fyrri tíma.

Helstu verkefni:

  • rannsaka sögulegar heimildir og loftmyndir í leit að vísbendingum um forna búsetu
  • skrásetja fornleifar á vettvangi
  • grafa upp fornleifar, lýsa þeim, teikna þær upp og mæla
  • greina sýni, til dæmis með tilliti til skordýra, frjókorna eða plöntuleifa
  • greining á manna- og dýrabeinum og gripagreining
  • úrvinnsla á rannsóknargögnum og skýrslugerð

Sem fornleifafræðingur gætirðu unnið við fjölbreytt verkefni; sinnt vettvangsvinnu á borð við uppgröft og skráningu, eða vinnu innandyra svo sem við túlkun, úrvinnslu, kennslu eða miðlun á rannsóknarniðurstöðum.

Hvernig verð ég?

Nám í fornleifafræði er í boði við sagnfræði- og heimspekideild Háskóla Íslands, hvort tveggja þriggja ára grunnnám til BA – prófs sem og framhaldsnám.

Hæfnikröfur

Starf fornleifafræðings krefst mikillar nákvæmni og þolinmæði. Hæfni við áætlanagerð og skipulagshæfileikar eru æskilegir. Fornleifafræðingur þarf að sýna frumkvæði í starfi og sjálfstæð vinnubrögð en einnig getu til að starfa í teymi. Í starfinu eru notaðar skóflur og múrskeiðar við uppgröft, auk ýmissa mælitækja.

 

Náms- og starfsráðgjöf

Náms- og starfsráðgjafar hjálpa til við upplýsingaleit og aðstoða að finna leiðir til að bæta færni í námi og efla í starfi.

Um er að ræða ráðgjafa símenntunarmiðstöðva, háskóla, á vegum fagráða eða sérfróða um raunfærnimat.

Ábendingar

Vefurinn í er sífelldri vinnslu við að bæta virkni og innihald. Allar ábendingar um úrbætur eru vel þegnar og við hlustum á allt sem notendur hafa að segja.

Umsjón: Fræðslumiðstöð atvinnulífsins

Umsjónarmaður: Arnar Þorsteinsson (arnar@frae.is)