Framreiðslumaður

Framreiðslumenn eru faglærðir þjónar sem vinna einkum á veitingastöðum, hótelum, kaffihúsum eða við veisluþjónustu. Í starfinu felst að undirbúa fundi, borðhald, veislur og sinna daglegri stjórnun í veitingasölum. Framreiðslumenn sjá einnig um innkaup á vörum, mat- og vínseðla í samvinnu við matreiðslumenn, viðeigandi uppröðun húsbúnaðar og bera ábyrgð á þjónustu við gesti. Framreiðsla er löggilt iðngrein.

Helstu verkefni:

  • taka á móti gestum, afhenda matseðla, þjónusta og ráðleggja
  • veita upplýsingar um mat svo sem hráefni og eldunaraðferðir
  • taka niður pantanir og bera fram veitingarnar
  • sjá um lokastig matreiðslu í sal með því að skera og eldsteikja þegar við á
  • leiðbeina um val á mat- og drykk, skreytingum og fyrirkomulagi veislufanga
  • útbúa reikninga, taka við greiðslu og sjá um daglegt uppgjör

Framreiðslumenn sjá einnig um vínbirgðir og tryggja rétta meðhöndlun á víni ásamt því að blanda og afgreiða drykki.

Hvernig verð ég?

Nám í framreiðslu er kennt í Hótel og matvælaskólanum í Kópavogi og við Verkmenntaskólann á Akureyri. Meðalnámstími er þrjú ár að meðtalinni starfsþjálfun. Raunfærnimat hefur farið fram og/eða kann að vera í boði.

Hæfnikröfur

Við framreiðslu er mikilvægt að hafa áhuga á því hvernig matur er framreiddur, borðskreytingum, skipulagningu borðhalds og veisluhalda auk þess að búa yfir þekkingu á víni. Í starfi sem framreiðslumaður þarftu að geta tekið á móti viðskiptavinum með fjölbreyttar óskir, þarfir, siði og menningarlegan bakgrunn. Æskilegt er að geta leiðbeint gestum hvort tveggja á íslensku og erlendum tungumálum.

Náms- og starfsráðgjöf

Náms- og starfsráðgjafar hjálpa til við upplýsingaleit og aðstoða að finna leiðir til að bæta færni í námi og efla í starfi.

Um er að ræða ráðgjafa símenntunarmiðstöðva, háskóla, á vegum fagráða eða sérfróða um raunfærnimat.

Ábendingar

Vefurinn í er sífelldri vinnslu við að bæta virkni og innihald. Allar ábendingar um úrbætur eru vel þegnar og við hlustum á allt sem notendur hafa að segja.

Umsjón: Fræðslumiðstöð atvinnulífsins

Umsjónarmaður: Arnar Þorsteinsson (arnar@frae.is)