Grafískur hönnuður

Grafískir hönnuðir starfa við að miðla hvers kyns efni á sjónrænan og auðskilinn hátt. Í starfinu er unnið með texta, letur, myndir og liti. Aðferðum grafískrar hönnunar er beitt við hönnun á auglýsingum, firmamerkjum, umbúðum og ýmsum öðrum prentgripum ásamt sjónvarpsefni og grafísku útliti vefsíðna. Grafískir hönnuðir hanna einnig leturgerðir, vinna við „effecta“ í kvikmyndum og margt fleira.

Helstu verkefni:

  • hugmyndavinna og skissugerð
  • uppsetning og frágangur á efni til prentunar
  • hönnun fyrir skjámiðla
  • ráðgjöf um útlit og kynningarmál fyrirtækja
  • hönnun á sýningarbásum fyrir vöru- og þjónustusýningar

Í starfi grafísks hönnuðar gætirðu til dæmis starfað á auglýsingastofu, í fjölmiðlum eða prentsmiðjum. Unnið er með margskonar tölvutengdan búnað, leturgerðir og stílbrigði, oftast í samvinnu við aðra svo sem umbrotsfólk, markaðsfræðinga, textahöfunda, kvikmyndagerðarfólk, prentara eða smiði.

Hvernig verð ég?

Grafísk hönnun er þriggja ára háskólanám til BA-prófs við hönnunar- og arkitektúrdeild Listaháskóla Íslands.

Hæfnikröfur

Grafískir hönnuðir þurfa að hafa áhuga á hönnun og framsetningu upplýsinga. Grafísk hönnun tekur sífelldum breytingum og því er mikilvægt að fylgjast vel með nýjungum og því sem er að gerast í starfsumhverfinu. Rík sköpunargáfa og hæfni í að sinna fjölbreyttum verkefnum eru góðir kostir.

Nánari upplýsingar

Náms- og starfsráðgjöf

Náms- og starfsráðgjafar hjálpa til við upplýsingaleit og aðstoða að finna leiðir til að bæta færni í námi og efla í starfi.

Um er að ræða ráðgjafa símenntunarmiðstöðva, háskóla, á vegum fagráða eða sérfróða um raunfærnimat.

Ábendingar

Vefurinn í er sífelldri vinnslu við að bæta virkni og innihald. Allar ábendingar um úrbætur eru vel þegnar og við hlustum á allt sem notendur hafa að segja.

Umsjón: Fræðslumiðstöð atvinnulífsins

Umsjónarmaður: Arnar Þorsteinsson (arnar@frae.is)