Húsgagnasmiður

Húsgagnasmiður vinnur við að smíða, gera upp og endurnýja gömul húsgögn og innréttingar, ásamt því til dæmis að smíða leiktjöld, leikmuni eða innréttingar í skip. Húsgagnasmiðir vinna gjarnan út frá hugmyndum og verklýsingum hönnuða eða eftir eigin teikningum. Húsgagnasmíði er löggilt iðngrein.

Helstu verkefni:

  • meta þörf á viðhaldi eða breytingum á húsgögnum og tréverki innanhúss
  • smíða almenn heimilis- og skrifstofuhúsgögn
  • setja saman smíðishluta, spónleggja, líma, slípa og meðhöndla hlut á lokastigi
  • leiðbeina um val á efni og vinnuaðferðum
  • smíða plötu- og grindarhúsgögn, sethúsgögn, útihurðir og glugga
  • smíða og setja upp innréttingar, innihurðir og tréstiga
  • klæða gólf, veggi og loft innanhúss

Sem húsgagnasmiður gætirðu unnið á verkstæði, við sérsmíði og viðgerðir, á byggingarstað eða við ráðgjöf og sölu í húsgagnaverslun. Húsgagnasmiðir vinna mikið með höndunum en einnig er um að ræða sérhæfða vélavinnu til dæmis í tölvustýrðum trésmíðavélum.

Hvernig verð ég?

Nám í húsgagnasmíði er kennt við Fjölbrautaskóla Norðurlands vestra, Tækniskólann og Verkmenntaskólann á Akureyri auk þess sem grunnnám bygginga- og mannvirkjagreina er kennt víðar. Meðalnámstími er fjögur ár, fimm annir í skóla og 72 vikna starfsþjálfun.

Hæfnikröfur

Húsgagnasmiðir leggja mat á viðhald og viðgerðir húsgagna og þurfa því að þekkja helstu eiginleika og verkan efna og geta valið efni við hæfi hverju sinni. Einnig er unnið með yfirborðsefni svo sem lökk og litarefni og því gott að þekkja grunnatriði lita- og formfræði. Þá er mikilvægt að vera fær um að lesa teikningar af einstökum húsgögnum og geta teiknað upp deililausnir og frágang – fríhendis eða með teikniforritum.

Náms- og starfsráðgjöf

Náms- og starfsráðgjafar hjálpa til við upplýsingaleit og aðstoða að finna leiðir til að bæta færni í námi og efla í starfi.

Um er að ræða ráðgjafa símenntunarmiðstöðva, háskóla, á vegum fagráða eða sérfróða um raunfærnimat.

Ábendingar

Vefurinn í er sífelldri vinnslu við að bæta virkni og innihald. Allar ábendingar um úrbætur eru vel þegnar og við hlustum á allt sem notendur hafa að segja.

Umsjón: Fræðslumiðstöð atvinnulífsins

Umsjónarmaður: Arnar Þorsteinsson (arnar@frae.is)