Leikstjóri

Leikstjórar bera ábyrgð á greiningu, hugmyndavinnu og listrænni framsetningu þeirra verkefna sem þeir stjórna hverju sinni. Auk þess felst í starfi leikstjóra að gera verk- og kostnaðaráætlanir, stjórna æfingum, tryggja leikurum krefjandi verkefni til að fást við og samhæfa störf allra sem að vinnunni koma.

Helstu verkefni

  • velja handrit og gera það tilbúið til flutnings í samstarfi við meðhöfunda
  • skipuleggja og stjórna áheyrnarprufum og velja í hlutverk
  • skipuleggja framleiðsluferli í samvinnu við framleiðendur
  • yfirumsjón með samspili listrænna þátta á borð við leikmynd, búninga, leikmuni, lýsingu, brellur, tónlist, gervi, dans og sviðsframkomu
  • umsjón með eftirvinnslu svo sem klippingu, tæknibrellum og vali á tónlist
  • sjá til að tíma- og fjárhagsáætlanir standist

Leikstjórar vinna í leikhúsum, við kvikmyndir og gerð leikins efnis fyrir útvarp og sjónvarp, í samstarfi við hönnuði og aðra listræna stjórnendur, framleiðendur og ritstjóra.

Hvernig verð ég?

Á Íslandi er ekki boðið upp á viðurkennt nám í leikstjórn, hvorki fyrir svið, kvikmyndir né sjónvarp. Listaháskóli Íslands býður upp á þriggja ára nám til BA-gráðu fyrir leikara, auk BA-náms fyrir sviðshöfunda og BA-náms í samtímadansi. Allar þessar brautir eru ágætur undirbúningur fyrir störf við leikstjórn. Þá býður Kvikmyndaskóli Íslands upp á námsleið í handritsgerð og leikstjórn.

Hæfnikröfur

Sem leikstjóri þarftu að búa yfir listrænum hæfileikum til að skapa og geta deilt ábyrgð verks með hópi meðhöfunda. Mikilvægt er að geta laðað fram sköpunargleði og hugmyndaauðgi samstarfsfólks auk hæfni í skipulags- og áætlanagerð. Góð leiðtoga- og samskiptafærni eru einnig æskilegir eiginleikar ásamt því að vera hvetjandi og geta sýnt frumkvæði. Leikstjóri þarf að geta hugsað í lausnum og tekið ákvarðanir á skjótan og ákveðinn hátt.

Náms- og starfsráðgjöf

Náms- og starfsráðgjafar hjálpa til við upplýsingaleit og aðstoða að finna leiðir til að bæta færni í námi og efla í starfi.

Um er að ræða ráðgjafa símenntunarmiðstöðva, háskóla, á vegum fagráða eða sérfróða um raunfærnimat.

Ábendingar

Vefurinn í er sífelldri vinnslu við að bæta virkni og innihald. Allar ábendingar um úrbætur eru vel þegnar og við hlustum á allt sem notendur hafa að segja.

Umsjón: Fræðslumiðstöð atvinnulífsins

Umsjónarmaður: Arnar Þorsteinsson (arnar@frae.is)