Lyfjafræðingur

Lyfjafræðingar vinna við allt sem snertir lyf og rétta notkun á þeim. Í lyfjaiðnaði tengist starfið framleiðslu lyfja ásamt gæðaeftirliti og skráningum. Á lyfjamarkaði vinna lyfjafræðingar við inn- og útflutning lyfja og markaðsmál en í apótekum felast störfin helst í ráðgjöf, eftirliti, stjórnun og afgreiðslu lyfja. Lyfjafræðingar eru löggilt heilbrigðisstétt.

Helstu verkefni:

  • mæla, blanda og afgreiða lyf
  • útskýra notkun og geymslu lyfja fyrir sjúklingum
  • veita upplýsingar og ráðleggingar um lyf
  • sjá um að lyf og skyld efni séu geymd við réttar aðstæður
  • meta og gæðaprófa efni til lyfjagerðar

Sem lyfjafræðingur gætirðu starfað í lyfjaiðnaði, við markaðsmál, á heilbrigðisstofnun, sjúkrahúsi, apóteki, heilsugæslu, eða á öðrum opinberum stofnunum sem tengjast geiranum. Einnig geta lyfjafræðingar starfað á rannsóknarstofu við ýmis konar mælingar, rannsóknir og gæðaeftirlit.

Hvernig verð ég?

Nám í lyfjafræði við Háskóla Íslands skiptist í tvennt; þriggja ára BS – nám og tveggja ára meistaranám í lyfjafræði sem veitir rétt til að sækja um starfsleyfi. Að auki er möguleiki að fara í meistaranám í lyfjavísindum en í því er lögð áhersla á rannsóknir á ákveðnu sérsviði lyfjafræðinnar.

Hæfnikröfur

Lyfjafræðingar þurfa starfsleyfi frá landlækni og er krafist MS – prófs í lyfjafræði auk sex mánaða starfsþjálfunar. Viðbótarkröfur eru fyrir starfsleyfi á sérsviðum. Lyfjafræðingur þarf að geta borið ábyrgð á umsýslu lyfja og þeirri þjónustu sem veitt er auk þess sem mikilvægt er að þekkja lyfjalög sem og faglegar takmarkanir og þagnarskyldu þegar við á.

Náms- og starfsráðgjöf

Náms- og starfsráðgjafar hjálpa til við upplýsingaleit og aðstoða að finna leiðir til að bæta færni í námi og efla í starfi.

Um er að ræða ráðgjafa símenntunarmiðstöðva, háskóla, á vegum fagráða eða sérfróða um raunfærnimat.

Ábendingar

Vefurinn í er sífelldri vinnslu við að bæta virkni og innihald. Allar ábendingar um úrbætur eru vel þegnar og við hlustum á allt sem notendur hafa að segja.

Umsjón: Fræðslumiðstöð atvinnulífsins

Umsjónarmaður: Arnar Þorsteinsson (arnar@frae.is)