Matartæknir

Matartæknir matreiðir algengan heimilismat á fjölbreytilegan hátt og hugar sérstaklega að þörfum einstakra hópa svo sem barna, aldraðra og sjúklinga. Algengir vinnustaðir matartækna eru heilbrigðisstofnanir og mötuneyti. Matartæknar elda einnig hátíðarmat og setja saman matseðla með hliðsjón af ýmsum sérþörfum. Matartæknir fær réttindi með leyfisbréfi frá landlækni.

Helstu verkefni:

  • semja matseðla með hliðsjón af hollustu og næringargildi
  • skipuleggja innkaup og panta inn
  • taka á móti hráefni og undirbúa það til matargerðar
  • breyta matseðlum fyrir þá sem þurfa á sérfæði að halda
  • afgreiða fæði úr eldhúsi
  • reka mötuneyti, til dæmis í skólum
Hvernig verð ég?

Matartæknanám er um þriggja ára nám á framhaldsskólastigi, þar með talin 80 vikna starfsþjálfun, í Menntaskólanum í Kópavogi og Verkmenntaskólanum á Akureyri.

Raunfærnimat hefur farið fram og/eða kann að vera í boði.

Hæfnikröfur

Matartæknir þarf að þekkja vel til matreiðslu á almennum heimilismat, næringarfræði og fæðuofnæmis. Mikilvægt er að geta lesið og túlkað innihaldslýsingar á matvælum, reiknað út næringargildi og aðlagað matarskammta að þörfum einstaklinga og hópa.

Þá er færni í skurði og meðferð á grænmeti, fiski og kjöti afar gagnleg ásamt því að passa vel upp á hreinlæti og þrif. Í starfi sem matartæknir notarðu ýmis handverkfæri auk helstu véla og tækja sem notuð eru í eldhúsum.

Náms- og starfsráðgjöf

Náms- og starfsráðgjafar hjálpa til við upplýsingaleit og aðstoða að finna leiðir til að bæta færni í námi og efla í starfi.

Um er að ræða ráðgjafa símenntunarmiðstöðva, háskóla, á vegum fagráða eða sérfróða um raunfærnimat.

Ábendingar

Vefurinn í er sífelldri vinnslu við að bæta virkni og innihald. Allar ábendingar um úrbætur eru vel þegnar og við hlustum á allt sem notendur hafa að segja.

Umsjón: Fræðslumiðstöð atvinnulífsins

Umsjónarmaður: Arnar Þorsteinsson (arnar@frae.is)