Sjúkraflutningamaður

Sjúkraflutningamenn meta áverka eftir slys, veita fyrstu hjálp og flytja sjúklinga á sjúkrastofnun ef með þarf. Í starfinu felast útköll í neyðartilvikum svo sem við bíl- eða flugslys, umhverfisslys eða veðurofsa. Sjúkraflutningamaður er löggilt starfsheiti.

Helstu verkefni:

  • veita fyrstu hjálp eða beita endurlífgun
  • neyðargreining og meðferð á meðan á sjúkraflutningi stendur
  • fylgjast með sjúklingi og skrá niður ástand hans
  • meta alvarleika veikinda eða áverka og forgangsraða
  • keyra sjúkrabíl á ákveðinn stað eftir leiðbeiningum neyðarlínu
  • sótthreinsa og þrífa sjúkrabíl eftir meðferð sjúklinga
  • gefa lyf í samráði við lækni

Sjúkraflutningamenn starfa í sjúkrabílum, í sjúkraflutningaflugvélum eða á skipum með björgunarsveitarfólki. Oftast er unnið í samstarfi við annað heilbrigðisstarfsfólk auk lögreglu og/eða slökkviliðs.

Hvernig verð ég?

Grunnnám sjúkraflutningamanna er um 130 klukkustunda námskeið í umsjón Sjúkraflutningaskólans. Námið er hvort tveggja bóklegt og verklegt en meðal annars þarf að ljúka starfskynningu á neyðarbíl.

Að loknum 36 mánuðum í starfi sem almennur sjúkraflutningamaður fara flestir á um 320 klukkustunda námskeið í neyðarflutningum en einnig er hægt að sækja nám bráðatæknis til útlanda. Að auki sækja sjúkraflutningamenn ýmis sérhæfð námskeið svo sem um sjúkraflutninga í óbyggðum eða bráðaþjónustu við börn.

Hæfnikröfur

Sjúkraflutningamenn þurfa að geta unnið undir talsverðu álagi sem tengist því að koma að fólki í mjög erfiðum aðstæðum. Áhugi á læknis- eða hjúkrunarfræði er æskilegur ásamt áreiðanleika í starfi, hæfni til sinna fjölbreytilegum verkefnum og sýna samkennd.

Sjúkraflutningamenn og bráðatæknar fá starfsleyfi frá landlækni og þurfa að hafa lokið viðurkenndu námi í sjúkraflutningum. Í starfi sjúkraflutningamanns er mikilvægt að þekkja faglegar takmarkanir og virða þagnarskyldu þegar við á.

Í starfinu er notaður búnaður á borð við hjartalínurita, hjartastuðtæki, öndunargrímur og fleira sem nýtist við að aðstoða sjúklinga. Sjúkraflutningamaður þarf að vera í góðu líkamlegu formi, andlega og líkamlega auk þess sem farið er fram á aukin ökuréttindi (meirapróf).

Náms- og starfsráðgjöf

Náms- og starfsráðgjafar hjálpa til við upplýsingaleit og aðstoða að finna leiðir til að bæta færni í námi og efla í starfi.

Um er að ræða ráðgjafa símenntunarmiðstöðva, háskóla, á vegum fagráða eða sérfróða um raunfærnimat.

Ábendingar

Vefurinn í er sífelldri vinnslu við að bæta virkni og innihald. Allar ábendingar um úrbætur eru vel þegnar og við hlustum á allt sem notendur hafa að segja.

Umsjón: Fræðslumiðstöð atvinnulífsins

Umsjónarmaður: Arnar Þorsteinsson (arnar@frae.is)