Prentiðn er starfstengt nám á framhaldsskólastigi. Meginmarkmið þess er að nemendur öðlist þekkingu og færni til að takast á við viðfangsefni og nýjungar greinarinnar. Í því felst meðal annars að taka við verki á prentplötu, myndmóti eða á tölvutæku formi ásamt vinnu við prentun og umhirðu prentvéla.
Prentun er löggilt iðngrein. Meðalnámstími er þrjú ár að meðtalinni 48 vikna starfsþjálfun.
Prentiðn hefur verið kennd við Tækniskólann – skóla atvinnulífsins.
Umsækjendur þurfa að hafa lokið skyldunámi í samræmi við Aðalnámskrá grunnskóla. Sjá nánar á heimasíðu skóla.
Námið hefur verið lánshæft hjá Menntasjóði námsmanna. Fag- og stéttarfélög veita oft styrki til náms. Fáðu frekari upplýsingar hjá þínu félagi.
Prentiðn skiptist í almennar bóklegar greinar, sérgreinar prentunar og starfsþjálfun.
Fyrstu þrjár til fjórar annirnar er farið í grunnnám upplýsinga- og fjölmiðlagreina og síðan tekur sérhæfing prentunar við. Nemandi gerir námssamning við meistara í faginu þar sem starfsþjálfunin fer fram.
Að námi og starfsþjálfun lokinni er möguleiki á að fara í sveinspróf sem veitir rétt til starfa í greininni ásamt inngöngu í nám til iðnmeistaraprófs. Einnig er hægt að ljúka viðbótarnámi til stúdentsprófs.
Náms- og starfsráðgjafar hjálpa til við upplýsingaleit og aðstoða að finna leiðir til að bæta færni í námi og efla í starfi.
Um er að ræða ráðgjafa símenntunarmiðstöðva, háskóla, á vegum fagráða eða sérfróða um raunfærnimat.
