Lífeindafræðingar framkvæma rannsóknir á mælanlegum þáttum í líkama manna og dýra. Mældir eru þættir sem hafa áhrif á heilsufar lífvera svo sem erfðaþættir og efnaáhrif. Hvort tveggja er um að ræða þjónusturannsóknir sem gagnast við sjúkdómsgreiningar og meðferð sjúkdóma og vísindarannsóknir sem efla þekkingu á viðkomandi sviði. Lífeindafræðingar eru löggild heilbrigðisstétt.

Flestir lífeindafræðingar starfa á rannsóknastofum sjúkrahúsa. Auk þess starfa margir hjá fyrirtækjum í erfðagreiningu og lyfjaiðnaði, matvælaframleiðslu, iðnaði og stofnunum sem þjóna landbúnaði. Í starfinu er unnið með eindir, smáar og stórar; frumeindir, sameindir, erfðaefnisbúta, prótein, ensím, frumur, líffæri og líffærakerfi. Raunar allt frá frumeind upp í þá einingu lífs sem kallast maður.

Helstu verkefni

- umsjón með tækjum á rannsóknarstofum
- greining og vinnsla á niðurstöðum mælinga
- sýnataka og ráðgjöf um sýnatökur
- ráðgjöf um túlkun niðurstaðna og tengsl rannsókna
- þróun, mat og val á nýrri tækni, tækjum og aðferðum

Hæfnikröfur

Lífeindafræðingar fá starfsleyfi frá landlækni og er krafist BS-prófs í lífeindafræði auk eins árs diplómanáms að lágmarki. Lífeindafræðingur þarf að þekkja vel þau lög og reglugerðir sem gilda um heilbrigðisstarfsmenn og geta borið ábyrgð á rannsóknarstörfum í lífvísindum. Í starfi lífeindafræðings er mikilvægt að vera skipulagður, nákvæmur og athugull, þekkja siðareglur stéttarinnar, virða faglegar takmarkanir og þagnarskyldu þegar við á.

Félag lífeindafræðinga