Bifvélavirkjun er starfstengt nám á framhaldsskólastigi. Í náminu felst meðal annars að auka þekkingu og færni við greiningu og viðgerðir bilana í helstu gerðum ökutækja. Möguleiki er að fá færni sem aflað er á vinnumarkaði metna.
Bifvélavirkjun er löggilt iðngrein. Meðalnámstími er þrjú og hálft ár að meðtalinni 48 vikna starfsþjálfun.
Bifvélavirkjun hefur verið kennd í Borgarholtsskóla, Fjölbrautaskóla Norðurlands vestra og Verkmenntaskólanum á Akureyri.
Grunnnám bíl-, málm og véliðngreina hefur verið kennt hjá Fjölbrautaskóla Suðurlands, Fjölbrautaskóla Suðurnesja og Tækniskólanum.
Umsækjendur þurfa að hafa lokið skyldunámi í samræmi við Aðalnámskrá grunnskóla, sjá nánar á heimasíðum skólanna.
Nám í bifvélavirkjun hefur að hluta til verið lánshæft hjá Menntasjóði námsmanna.
Fag- og stéttarfélög veita oft styrki til náms. Fáðu frekari upplýsingar hjá þínu félagi.
Bifvélavirkjun skiptist í almennar bóklegar greinar, sérgreinar og starfsþjálfun. Fyrsta árið sameiginlegt grunnnám bíliðngreina en eftir það sérhæfa nemendur sig í bifvélavirkjun. Nemandi gerir námssamning við iðnmeistara í faginu þar sem starfsþjálfunin fer fram.
Að námi og starfsþjálfun lokinni er möguleiki á að fara í sveinspróf sem veitir rétt til starfa í greininni ásamt inngöngu í nám til iðnmeistaraprófs. Einnig er hægt að ljúka viðbótarnámi til stúdentsprófs.
Náms- og starfsráðgjafar hjálpa til við upplýsingaleit og aðstoða að finna leiðir til að bæta færni í námi og efla í starfi.
Um er að ræða ráðgjafa símenntunarmiðstöðva, háskóla, á vegum fagráða eða sérfróða um raunfærnimat.
