Námi í kvikmyndatækni og kvikmyndagerð á framhaldsskólastigi er ætlað að búa nemendur undir fjölbreytt störf í heimi kvikmynda. Fjallað er um hugmynda- og handritsgerð auk allra þátta kvikmyndagerðar; undirbúning, sviðshönnun, lýsingu, tökur, hljóð- og eftirvinnslu bíómynda og sjónvarpsefnis.
Námstími er tvö ár en einnig hægt að ljúka viðbótarnámi til stúdentsprófs.
Kröfur
Umsækjendur þurfa að hafa lokið skyldunámi í samræmi við Aðalnámskrá grunnskóla en best að kanna nánari aðgangskröfur á heimasíðum skólanna þar sem námið er í boði.
Fræðslusjóðir stéttarfélaga veita oft styrki til náms. Fáðu frekari upplýsingar hjá þínu félagi.
Námsskipulag
Nám í kvikmyndatækni samanstendur af almennum bóknámsgreinum og sérhæfðari áföngum þar sem verklegur hluti námsins getur farið fram í samvinnu við atvinnulífið; starfandi framleiðslufyrirtæki og/eða fagfólk á sviðinu.
Mikið er lagt upp úr hópvinnu enda mikilvægt að búa yfir víðtækri þekkingu, ekki bara á einu sérsviði heldur á sem flestum þáttum kvikmyndagerðar.
Kennsla
Kvikmyndatækni er kennd á vegum Rafmenntar, kvikmyndagerð er eitt kjörsviða á listnámsbraut Borgarholtsskóla auk kvikmyndabrautar Fjölbrautaskóla Norðurlands vestra.
Sjá einnig námsframboð Kvikmyndaskóla Íslands en þar þarf alla jafna að hafa lokið stúdentsprófi.
Að loknu námi
Námið getur verið góður undirbúningur fyrir frekara nám í kvikmyndagerð eða skyldum greinum á borð við fjölmiðlafræði og grafíska hönnun, ásamt þátttöku í starfstengdum verkefnum.
Tengt nám
