Rafvirkjun er löggilt iðngrein á framhaldsskólastigi. Meðalnámstími er fjögur ár að meðtalinni starfsþjálfun þar sem fylgt er rafrænni ferilbók sem heldur utan um framvindu vinnustaðanámsins.
Í náminu felst að auka þekkingu og færni í lagningu raflagna, uppsetningu og tengingu rafbúnaðar, mælingar, eftirlit og viðhald á rafbúnaði. Hugsanlegt er að fá færni sem aflað er á vinnumarkaði metna.
Rafvirkjun er kennd í Tækniskólanum, Fjölbrautaskólanum í Breiðholti, Fjölbrautaskóla Suðurnesja, Fjölbrautaskóla Suðurlands, Fjölbrautaskóla Vesturlands, Fjölbrautaskóla Norðurlands vestra, Verkmenntaskólanum á Akureyri og Verkmenntaskóla Austurlands.
Þá hefur grunnnám rafiðna verið kennt í Framhaldsskólanum í Vestmannaeyjum og Menntaskólanum á Ísafirði.
Umsækjendur þurfa að hafa lokið skyldunámi í samræmi við Aðalnámskrá grunnskóla. Sjá nánar á heimasíðu skóla.
Námið hefur verið lánshæft hjá Menntasjóði námsmanna. Fag- og stéttarfélög veita oft styrki til náms. Fáðu frekari upplýsingar hjá þínu félagi.
Rafvirkjun skiptist í almennar bóklegar greinar, sérgreinar og starfsþjálfun. Fyrstu tvö árin er farið í sameiginlegt grunnnám rafiðngreina en eftir það sérhæfa nemendur sig í rafvirkjun.
Hægt er að fara tvær leiðir í náminu. Annars vegar er verknámsleið þar sem nemar taka fleiri faggreinar í skóla en á vettvangi og því styttri starfsþjálfun eða 24 vikur. Hinsvegar er samningsbundið iðnnám þar sem nemar gera samning við meistara og taka faggreinar þar – alls 48 vikur í starfsþjálfun.
Nemandi gerir námssamning við meistara í faginu þar sem starfsþjálfunin fer fram.
Að námi og starfsþjálfun lokinni er möguleiki á að fara í sveinspróf sem veitir rétt til starfa í greininni ásamt inngöngu í nám til iðnmeistaraprófs eða rafiðnfræði. Einnig er hægt að ljúka viðbótarnámi til stúdentsprófs.
Náms- og starfsráðgjafar hjálpa til við upplýsingaleit og aðstoða að finna leiðir til að bæta færni í námi og efla í starfi.
