Rennismíði er starfstengt nám á framhaldsskólastigi. Í náminu felst að auka þekkingu og færni við notkun efna og verkfæra á renniverkstæðum ásamt hönnun og nýsmíði. Hugsanlegt er að fá færni sem aflað er á vinnumarkaði metna.
Rennismíði er löggilt iðngrein. Meðalnámstími er þrjú ár auk starfsþjálfunar þar sem fylgt er rafrænni ferilbók sem heldur utan um framvindu vinnustaðanámsins.
Nám í rennismíði hefur verið kennt við Borgarholtsskóla og Tækniskólann. Grunnnám málmiðngreina hefur einnig verið kennt við Fjölbrautaskólann á Suðurnesjum, Fjölbrautarskóla Norðurlands Vestra, Fjölbrautarskóla Suðurlands, Fjölbrautarskóla Vesturlands, Framhaldsskólann í Vestmannaeyjum, Menntaskólann á Ísafirði, Verkmenntaskóla Austurlands og Verkmenntaskólann á Akureyri.
Umsækjendur þurfa að hafa lokið skyldunámi í samræmi við Aðalnámskrá grunnskóla, sjá nánar á heimasíðu skóla.
Námið hefur verið lánshæft hjá Menntasjóði námsmanna. Fag- og stéttarfélög veita oft styrki til náms. Fáðu frekari upplýsingar hjá þínu félagi.
Rennismíði skiptist í almennar bóklegar greinar, sérgreinar og starfsþjálfun. Athugaðu hvort námið eða hluti þess geti verið kennt í fjarnámi.
Fyrstu tvö árin er farið í sameiginlegt grunnnám málmiðngreina en eftir það sérhæfa nemendur sig í rennismíði. Nemandi gerir námssamning við meistara í faginu þar sem starfsþjálfunin fer fram.
Að námi og starfsþjálfun lokinni er möguleiki á að fara í sveinspróf sem veitir rétt til starfa í greininni ásamt inngöngu í nám til iðnmeistaraprófs. Einnig er hægt að ljúka viðbótarnámi til stúdentsprófs.
Náms- og starfsráðgjafar hjálpa til við upplýsingaleit og aðstoða að finna leiðir til að bæta færni í námi og efla í starfi
