Gæðastjóri sér um rekstur, þróun og viðhald gæðakerfa fyrirtækja eða stofnanna. Í starfinu felst að hafa yfirumsjón með innleiðingu gæðakerfis, sjá til þess að það sé samofið viðkomandi starfsemi og að vinnulag sé í samræmi við hugmynda- og aðferðafræði gæðastjórnunar.
Hluti vinnunnar tengist því einnig að fylgjast með viðeigandi lögum og reglugerðum sem leitt geta til breytinga á gæðakerfinu auk þess að viðhalda eigin fagþekkingu með því að sækja viðeigandi námskeið og lesa fagbækur og tímarit.

Helstu verkefni

- framkvæmd innri úttekta, undirbúningur ytri úttekta og úrvinnsla
- vinna úr upplýsingum og lykiltölum til að meta árangur og virkni gæðakerfis
- tillögugerð um fræðslu til starfsfólks vegna gæðamála
- kynningar og þjálfun starfsfólks tengt gæðastarfi
- viðhald, útgáfa og dreifing gæðahandbókar

Hæfnikröfur

Góð almenn menntun er mikilvæg í starfi gæðastjóra t.a.m. íslensku- og enskukunnátta auk þess sem nauðsynlegt er að þekkja vel til starfsemi viðkomandi fyrirtækis, stofnunar eða stjórnsýslueiningar. Skipulags- og stjórnunarhæfileikar, frumkvæði og færni í samskiptum nýtast vel í starfinu.