Innanhúsarkitektar vinna að skapandi verkefnum sem tengjast nýtingu húsnæðis og innanhúss gæðum. Starfið er þríþætt; hugmyndavinna og frumdrög, teikningar og verklýsingar og að lokum umsjón og úttekt á því verkefni sem fyrir liggur hverju sinni. Innanhúsarkitekt er löggilt starfsheiti.

Í starfi sem innanhúsarkitekt gætirðu unnið við hönnun á einkaheimilum, í búðum, á hótelum, veitingastöðum, skólum, spítölum eða verksmiðjum.

Helstu verkefni

- veita þjónustu og ráðgjöf sem tengist skipulagi innanhúss
- gera úttekt með tilliti til mögulegs skipulags, innviða og innréttinga
- gerð áætlana og tilboða
- kynna sér framboð á byggingar- og húsgagnamarkaði

Hæfnikröfur

Innanhúsarkitektar þurfa hvort tveggja að geta hugað að listrænni hlið og útliti hönnunar en einnig því sem snýr að hagkvæmni og tæknilegri þáttum. Mikilvægt er að hafa hæfileika í teikningu ásamt tilfinningu fyrir litum, stíl og hlutföllum. Þá eru eiginleikar á borð við skipulagshæfni og að geta komið hugmyndum sínum vel frá sér æskilegir í starfi innanhúsarkitekts.

Félag húsgagna- og innanhúsarkitekta