Djákni sinnir sálgæslu, félagslegri og kirkjulegri þjónustu á vegum kirkju, stofnana og félagasamtaka. Starfið er fjölbreytt og lýtur að sálgæslu, fræðslu, barna- og æskulýðsstarfi, fjölskyldustarfi, hópastarfi og starfi með öldruðum.
Í starfi sem djákni vinnurðu í samvinnu við kirkjusöfnuð eða við skóla, elli- og hjúkrunarheimili eða sjúkrahús. Djáknar vinna ýmist í samstarfi við presta eða á eigin vegum.

Helstu verkefni

- líknar- og fræðsluþjónusta
- fjölbreytt kirkjustarf með öllum aldurshópum
- styðja þau sem eru einmana, búa við heilsubrest eða félagslega einangrun
- sálgæslustörf

Hæfnikröfur

Í starfi djákna er mikilvægt að búa yfir mikilli fagþekkingu, hafa samkennd með fólki og eiga gott með mannleg samskipti. Þjónustulund og áhugi á kirkjustarfi eru  mikilvægir  þættir sem og að starfa eftir markmiðum Þjóðkirkjunnar. Í þjónustu sinni  klæðast djáknar gjarnan ákveðnum klæðnaði, grænni skyrtu, ölbu og stólu. Til að geta starfað sem djákni þarf að hafa hlotið vígslu sem biskup annast.
Djáknafélag Íslands